Yəqin ki, hər kəs ömründə heç olmasa bircə dəfə də olsun sevgi mesajı yazıb və yaxud alıb. Belə mesajların “hücumu”na isə ən çox tanınmış simalar tuş gəlirlər. Lent.az ölkənin bir neçə tanınan şəxslərini arayıb onlara belə SMS-lərin gəlib-gəlmədiyini və ya daxil olduğu halda nə etdiklərini öyrəndik.
Güləş üzrə Olimpiya çempionu Fərid Mansurov tez-tez sevgi mesajları aldığını deyir. Aldığı mesajların sahibəsi isə naməlum olmur. İdmançının cavabsız qoyduğu məktublar da olur, amma bacardığı qədər çoxunu cavablandırmağa çalışır. Hazırda subay olan Fəridin daimi mesajlaşdığı ünvan da var.
Vəkil İsaxan Aşurov isə nəinki belə mesajlara, heç bizim belə sualımıza da cavab vermək istəmədi və bunu şəxsi həyata müdaxilə adlandırdı.
Hüquqşünas Ələsgər Məmmədli deyir ki, heç bir sevgi mesajı almır, onu bu baxımdan narahat edən xanımlar yoxdur. Ə. Məmmədli yalnız müştərisi olduğu mobil operatordan yazdığı mesajların ünvanına çatıb-çatmadığı barədə mesajlar aldığını söyləyir.
Dənizkənarı Bulvar İdarəsinin rəis müavini Nazim Məcidov etiraf edib ki, mobil telefonuna bəzən sevgi mesajları gəlir, amma cavabsız qoyur. Nazim müəllim, həyat yoldaşından başqa heç bir qadında gözü olmadığını və yalnız onu sevdiyini bildirir.
Əməkdar artist Aybəniz Haşımova deyir ki, mesajları yalnız qızından və həyat yoldaşından alır, tanımadığı nömrələrdən gələn mesajları isə heç oxumur: “Telefonuma tanımadığım şəxslər tərəfindən sevgi mesajlarının gəlməsinə də şərait yaratmıram. Bu arzu kimlərinsə ürəyində qalır. Qarşı tərəfin belə bir addım atması onun öz tərbiyəsindən asılıdır. Ümumiyyətlə, mən belə halların baş verməsi üçün imkan da yaratmaram”.
Partiya lideri Sərdar Cəlaloğlunun sözlərinə görə, onun telefonuna sevgi mesajları gəlmir, amma təsadüfi zənglər olur: “Kimsə zəng vurub deyir, gəl görüşək, tanış olaq. Bu kimi qeyri-ciddi müraciətlər olsa da, mən bunları cavabsız qoymuşam”.
Müğənni Baloğlan Əşrəfov isə ümumiyyətlə mesaj yaza bilmədiyini deyir: “Mənim mobil telefondan başım o qədər çıxmır, oradakı əməliyyatları edə bilmirəm. Mesaj yazmağı isə heç bacarmıram. Düzdür, mesaj gələndə oxuyuram. Sevgi mesajlarına gəlincə, bu hal həmişə olub və olacaq. Mənə də hərdən bir belə mesajlar göndərirlər”.
